2-வது டெஸ்ட் போட்டியில் அமித் மிஸ்ரா நீக்கப்பட்டது தொடர்பாக கேப்டன் டோனிக்கும், துணை கேப்டன் ஷேவாக்குக்கும் இடையே கருத்து வேறுபாடு ஏற்பட்டதாகவும், இந்திய அணியில் பிளவு இருப்பதாகவும் செய்திகள் வெளியாகி இருந்தன. அணியில் டோனி கோஷ்டி, ஷேவாக் கோஷ்டி என்று இரு பிரிவாக இருப்பதாகவும் அந்த தகவல் தெரிவித்தன.

 

இதை சுழற் பந்து வீரர் ஹர்பஜன்சிங் சமீபத்தில் மறுத்து இருந்தார். இந்த நிலையில் இந்திய அணியில் பிளவு எதுவும் இல்லை என்று அதிரடி பேட்ஸ் மேன் ஷேவாக் மறுத்துள்ளார்.

 

இது தொடர்பாக அவர் கூறியதாவது,

 

இந்திய அணியில் அனைவரும் ஒற்றுமையுடன் உள்ளனர். யாருக்கும், யாருடன் கருத்து வேறுபாடு இல்லை. ஒவ்வொரு வீரர்களும், மற்ற வீரர்களின் சாதனையை எண்ணி பெருமைப்படுகிறார்கள்.

 

இந்திய அணியில் பிளவு இருப்பதாக மீடியாக்கள் தான் ஊகத்தின் அடிப்படையில் தெரிவிக்கின்றன.

இவ்வாறு ஷேவாக் கூறினார்.

20 ஓவர் உலக கோப்பை போட்டியின் போது டோனிக்கும், ஷேவாக்குக்கும், இடையே கருத்து வேறுபாடு ஏற்பட்டதாக தகவல் வெளியானது. இதை டோனி மறுத்து இருந்தார். தற்போது ஷேவாக் மறுத்துள்ளார் என்பது குறிப்பிடத்தக்கது.