ஆக்லாந்து நகரில் இன்று நடந்த இப்போட்டியில் டாஸ் வென்ற ஆஸ்ட்ரேலியா அணி பேட்டிங்கைத் தேர்வு செய்தது. நிர்ணயிக்கப்பட்ட 50 ஓவர்களில் 7 விக்கெட் இழப்புக்கு 273 ரன்கள் குவித்தது. துவக்க வீரர் ஹேடின் 53 ரன்கள், கிரேக் வொய்ட் 54 ரன்கள், மைக்கேல் ஹஸ்ஸி 56 ரன்கள் எடுத்தனர்.

இதையடுத்து வெற்றி பெற 274 ரன்கள் தேவை என்ற இலக்குடன் களமிறங்கிய நியூஸீலாந்து அணி துவக்கத்திலேயே சரிவைச் சந்தித்தது. துவக்க வீரர்கள் மெக்குல்லம் 24 ரன்கள், இங்ராம் 14 ரன்கள் எடுத்தனர். முதல் விக்கெட்டிற்கு களமிறங்கிய குப்டில் 18 ரன்களில் ஆட்டமிழந்தார்.

நியூஸீலாந்து அணி 3 விக்கெட் இழப்புக்கு 43 ரன்கள் எடுத்திருந்த போது மழை குறுக்கிட்டதால் ஆட்டம் சிறிது நேரம் நிறுத்தப்பட்டது. போட்டி மீண்டும் துவங்கிய போது 45 ஓவர்களில் 266 ரன்கள் எடுக்க வேண்டும் என டக்வர்த் லூயிஸ் முறையில் நியூஸீலாந்து அணிக்கான வெற்றி இலக்கு மாற்றியமைக்கப்பட்டது.

இதன் பின்னர் களமிறங்கிய ஸ்காட் ஸ்டைரிஸ் ஓரளவு தாக்குப்பிடித்து 46 ரன்களும், ஹோப்கின்ஸ் 35 ரன்களும் எடுத்தனர். மறுமுனையில் அதிரடியாக விளையாடிய அணித்தலைவர் வெட்டோரி அணியை வெற்றிப் பாதைக்கு கொண்டு செல்லப் போராடினார்.

கடைநிலை வீரர்கள் சொற்ப ரன்களில் ஆட்டமிழந்தனர். அதைத் தொடர்ந்து வெட்டோரியும் 70 ரன்களில் அவுட் ஆனதால், நியூஸீலாந்து அணி 43.2 ஓவர்களில் அனைத்து விக்கெட்களையும் இழந்து 253 ரன்கள் மட்டுமே எடுத்தது. அணித் தலைவர் வெட்டோரிக்கு ஆட்டநாயகன் விருது வழங்கப்பட்டது.

இந்த வெற்றியின் மூலம் 5 ஒருநாள் போட்டிகள் கொண்ட தொடரை 1-1 என்ற போட்டிக்கணக்கில் அவுஸ்திரேலியா சமன் செய்துள்ளது.