தரநிலை 9ஆம் இடத்தில் உள்ள வெர்டாஸ்கோ, ஆஸ்ட்ரேலியாவின் கார்ஸ்டன் பால் என்பவரை 6- 7, 7- 6, 7- 5, 6- 2 என்ற செட் கணக்கில் போராடி வீழ்த்தினார்.

வெர்டாஸ்கோ 7 ஏஸ்களை அடிக்க பால் 13 ஏஸ்களை அடித்தார். இரட்டைத் தவறுகளிலும் இருவரும் சமமாகத் திகழ்ந்தனர். ஆனால் அறியாமல் ஏற்படும் பிழை என்ற வகையில் 63 முறை தவறிழைத்தார் பால். இதனால் பிரேக் பாயிண்ட்களை வெற்றியாக மாற்ற முடியாமல் போனது.

மற்றொரு ஆட்டத்தில் சுவிஸ். வீரர் ரோஜர் ஃபெடரர் அபாரமாக விளையாடி, ரஷ்யாவின் ஆந்த்ரீவ் என்பவரை 4- 6, 6- 2, 7- 6, 6-0 என்ற செட்களில் வீழ்த்தினார்.

முதல் செட்டில் இரட்டைத் தவறுகளை ஃபெடரர் செய்ததால் செட்டை இழந்தார். ஆனால் அதன் பிறகு சர்வீஸ், முன்னால் வந்து ஆக்ரோஷ டென்னிஸ் என்று ஃபெடரர் தனது ஷாட்களை ஆடியபோது ஆந்த்ரீவால் குறைவாகவே ஈடு கொடுக்க முடிந்தது.

மற்றொரு ஆட்டத்தில் பிரான்ஸ் வீரர் கயெல் மான்ஃபீஸ் 6- 4, 6- 4, 6- 4 என்ற செட் கணக்கில் ஆஸ்ட்ரேலிய வீரர் எப்டென் என்பவரை வீழ்த்தி அடுத்த சுற்றுக்கு முன்னேறினார்.

ரஷ்ய வீரர் நிகோலே டேவிடென்கோ (6), ஜெர்மனி வீரர் டைட்டர் கின்டிமேன் என்பவரை வீழ்த்தி 2-வது சுற்றுக்குள் நுழைந்தார்.

ஜார்கோ நைமினென், குர்ஷியாவின் மாரின் சிலிச், ஜெர்மனியின் ரைனர் ஷட்லர், அமெரிக்க வீரர் ஜேம்ஸ் பிளேக், செக். வீரர் டொமாஸ் பெர்டிச், சுவிஸ். வீரர் வார்வின்கா ஆகியோரும் 2-வது சுற்றுக்கு முன்னேறினர்.