இங்கிலாந்தை சேர்ந்த பிரபல கால்பந்து கிளப் லிவர்பூல். பிரிமியர் லீக், எப்.ஏ., கோப்பை, உய்பா, ஐரோப்பிய கோப்பை உட்பட 18 முறை பட்டம் வென்று சாதித்துள்ளது.

ஸ்டீவன் ஜெரார்டு, பெர்னாண்டோ டோரஸ் போன்ற முன்னணி வீரர்கள் இந்த அணியில் இடம் பெற்றுள்ளனர்.

கடந்த 2008ல் “போர்ப்ஸ்’ வர்த்தக பத்திரிகையின் கணிப்பின்படி, மான்செஸ்டர் யுனைடெட், ரியல் மாட்ரிட், ஆர்சனல் ஆகிய கால்பந்து கிளப் அணிகளுக்கு பிறகு நான்காவது விலையுயர்ந்த அணியாக லிவர்பூல் கருதப்பட்டது.

இப்படி புகழின் உச்சியில் இருந்த லிவர்பூல் அணி, சமீப காலமாக சரிவை சந்தித்தது. இதற்கு அணியின் உரிமையாளர்களான அமெரிக்காவை சேர்ந்த ஜார்ஜ் கில்லட் மற்றும் டாம் ஹிக்ஸ் இடையே ஏற்பட்ட கருத்து வேறுபாடு தான் முக்கிய காரணம்.

ரசிகர்களின் ஆதரவும் குறைந்த போக, சுமார் ஆயிரத்து 700 கோடி ரூபாய் கடனில் சிக்கியது. இதையடுத்து அணியின் 51 சதவீத பங்குகளை விற்க முடிவு செய்யப்பட்டது.

இதனை வாங்க, இந்தியாவின் ரிலையன்ஸ் நிறுவன அதிபரும் உலகின் 7வது பணக்காரருமான முகேஷ் அம்பானி மற்றும் சஹாரா நிறுவனத்தின் சுப்ரதோ ராய் ஆகியோர் முயற்சி செய்வதாக லண்டனில் இருந்து வெளியாகும் “டைம்ஸ்’ பத்திரிகை செய்தி வெளியிட்டது.

இதையடுத்து ஐ.பி.எல்., மும்பை இந்தியன்ஸ் அணியின் உரிமையாளராக உள்ள முகேஷ் அம்பானி, கால்பந்து அரங்கிலும் கால்பதிப்பார் என எதிர்பார்க்கப்பட்டது. ஆனால், லிவர்பூல் தொடர்பான செய்தியை ரிலையன்ஸ் நிறுவனம் மறுத்துள்ளது. இதன் செய்தி தொடர்பாளர் சுதீப் புர்கயஸ்தா கூறுகையில்,”"லிவர்பூர் பங்குகளை வாங்குவது தொடர்பான செய்தி தவறானது. இதனை முழுமையாக மறுக்கிறோம்,” என்றார்.

சஹாரா நிறுவன செய்தி தொடர்பாளர் அபிஜித் சர்கார் கூறுகையில்,"தற்போது கருத்து தெரிவிக்கும் நிலைமையில் இல்லை”என்றார்.