நான்குக்கு பூஜ்ஜியம் என்ற கோல் கணக்கில் அல்ஜீரிய அணியை வீழ்த்தி எகிப்து இறுதிப் போட்டிக்குத் தகுதி பெற்றுள்ளது.

எகிப்து தொடர்ந்து மூன்றாவது தடவையாக ஆபிரிக்க கிண்ண கால்பந்தாட்ட இறுதிப் போட்டிக்கு தகுதி பெற்றுள்ளமை குறிப்பிடத்தக்கது.

மிகவும் விறுவிறுப்பாக நடைபெற்ற இந்தப் போட்டியில் பல்வேறு சுவராஸ்யமான சம்பவங்கள் நடைபெற்றன.

அல்ஜீரிய அணி எட்டு வீரர்களுடனேயே எகிப்துடன் மோதியது என்பது குறிப்பிடத்தக்கது.

சட்டவிரோதமாக விளையாடிய காரணத்தினால் அல்ஜீரிய அணியின் கோல் காப்பாளர் உள்ளிட்ட மூன்று வீரர்கள் மைதானத்திலிருந்து வெளியேற்றப்பட்டனர்.

இதேவேளை, கானா மற்றும் நைஜீரிய அணிகளுக்கு இடையிலான அரையிறுதிப் போட்டியில் கானா அணி வெற்றியீட்டியது.

1992ம் ஆண்டுக்குப் பின்னர் முதல் தடவையாக கானா ஆபிரிக்கக் கிண்ண கால்பந்தாட்ட இறுதிப் போட்டியில் இம்முறை பங்கேற்க உள்ளது.

கானா அணி ஒன்றுக்கு பூஜ்ஜியம் என்ற கோல் கணக்கில் பலம்பொருந்திய நைஜீரிய அணியை வீழ்த்தியுள்ளது.

போட்டியின் 21 ஆவது நிமிடத்தில் கானாவின் காயான் என்ற வீரர் போட்டியில் போடப்பட்ட ஒரே கோலைப் போட்டார்.

கானா அணியின் கோல் காப்பாளர் ரச்சர்ட் கிங்ஸன் மிகச் சிறப்பான முறையில் விளையாடி பல கோல்களை தடுத்து நிறுத்தினார் என்பது குறிப்பிடத்தக்கது.