மேற்கிந்திய தீவுகள் கிரிக்கெட் அணியின் அதிரடி துடுப்பாட்ட வீரர் கிறிஸ் கெய்ல், நேற்று தனது 33 பிறந்தநாளை கொண்டாடினார். இவரது இமாலய சிக்ஸர்களுக்கு, ரசிகர்களிடையே தனி மரியாதை உண்டு.

இந்நிலையில் கிரிக்கெட் போட்டிகளில் சரியான உடல் சமநிலை கொண்ட எந்த வீரருக்கும், அதிரடியாக துடுப்பெடுத்தாடுவது எளிது என்று கிறிஸ் கெய்ல் தெரிவித்துள்ளார்.

இது குறித்து அவர் கூறுகையில், ஒரு கிரிக்கெட் வீரரின் முக்கிய திறமையே அவரது உடல் சமநிலை தான். கிரிக்கெட் போட்டிகளில் அதிரடியாக ஆடி பல சிக்ஸர்களை அடிக்க வேண்டுமானால், சிறந்த உடல் சமநிலையை பெற்றிருக்க வேண்டும்.

இந்த காலத்தில் சிக்ஸர் அடிப்பது என்பது ஒரு பெரிய காரியம் அல்ல, எல்லா வீரர்களும் சிக்ஸர் அடிக்கிறார்கள். முதலில் ஆடுகளத்தில் நிலைத்து விட்டால், அதன்பின்பு பந்துவீச்சாளர்களை எதிர்த்து அதிரடியாக ஆடுவது எளிது.

அவுஸ்திரேலியாவுக்கெதிரான முதல் லீக் போட்டி எங்களுக்கு முக்கியத்துவம் வாய்ந்தது என்றும் இப்போட்டியில் வெற்றி பெற்றால், மேற்கிந்திய தீவுகள் வீரர்கள் பெரியளவில் கொண்டாட உள்ளோம் எனவும் கூறினார்.

இவர் சமீபத்தில் முடிந்த ஐ.பி.எல் போட்டியில் அதிக சிக்சர் மற்றும் ஓட்டங்கள் குவித்த வீரர் என்ற பெருமையை பெற்றார் என்பது குறிப்பிடத்தக்கது.