நியூசிலாந்து அணிக்கெதிரான டி20 உலகக் கிண்ண பயிற்சிப் போட்டியில் அவுஸ்திரேலிய அணி 56 ஓட்டங்கள் வித்தியாசத்தில் வெற்றி பெற்றது.

கொழும்புவில் நடைபெற்ற டி20 கிரிக்கெட் பயிற்சி ஆட்டத்தில் அவுஸ்திரேலியா, நியூசிலாந்து அணிகள் மோதின.

முதலில் துடுப்பெடுத்தாடிய அவுஸ்திரேலியா அணி 20 ஓவர்களில் 6 விக்கெட் இழப்பிற்கு 139 ஓட்டங்களை எடுத்தது. தொடர்ந்து ஆடிய நியூசிலாந்து அணி 83 ஓட்டங்களுக்கு பரிதாபமாக சுருண்டது.

வார்னர் தொடக்கத்தில் அதிரடி ஆட்டம் ஆடினார் 1 பவுண்டரி 2 சிக்சர்களுடன் 24 ஓட்டங்கள் எடுத்து வெட்டோரியிடம் ஆட்டமிழந்தார்.

பின்பு மைக் ஹஸ்சி 5 ஓட்டங்கள், ஒயிட் 8 ஓட்டங்கள், பெய்லி 3 ஓட்டங்கள் என்று அடுத்தடுத்து ஆட்டமிழக்க 10 ஓவர்களில் 62/4 என்று ஆனது.

வாட்சன் 27 ஓட்டங்கள் எடுத்து வெளியேறினார். 12வது ஓவரின் முதல் பந்தில் அவுஸ்திரேலியா 71/5 என்று சரியும் அபாயத்தில் இருந்தது.

கடைசியில் மேக்ஸ்வெல் 24 ஓட்டங்களையும், மேத்யூ வேட் 25 ஓட்டங்களையும் எடுக்க அவுஸ்திரேலியா ஒருவழியாக 139 ஓட்டங்களை எட்டியது.

இதனையடுத்து 140 ஓட்டங்கள் இலக்குடன் துடுப்பெடுத்தாடிய நியூசிலாந்து அணி 17 ஓவரில் அனைத்து விக்கெட்டுகளையும் இழந்து 83 ஓட்டங்கள் மட்டுமே எடுத்து பரிதாபகரமாக தோல்வியடைந்தது.

பிரெண்டன் மெக்கல்லம் அணியில் இல்லை. இதனால் நியூசிலாந்து அணி துடுப்பாட்டத்தில் தடுமாறியது.

வில்லியம்சன் 17 ஓட்டங்களும், அணித்தலைவர் ராஸ் டெய்லர் 22 ஓட்டங்களும் எடுத்தனர். மற்ற வீரர்கள் சொற்ப ஓட்டங்களில் ஆட்டமிழந்தனர்.

பந்துவீச்சில் அவுஸ்திரேலிய அணி சார்பாக பிராட் ஹாக் 3 விக்கெட்டுகளையும், வாட்சன், மெக்காய், கமின்ஸ் ஆகியோர் தலா 2 விக்கெட்டுகளையும் கைப்பற்றினர்.