தேசிய விளையாட்டு பயிற்சி மையத்தின் சார்பாக ஒலிம்பிக்கில் பங்கேற்கும் இந்திய வீரர்களுக்கு பாராட்டு விழா நடத்தியது.

இதில் 2008ஆம் ஆண்டு ஒலிம்பிக்கில் வெண்கலம் வென்ற குத்துச்சண்டை வீரர் விஜேந்தர் சிங் பங்கேற்றார். வரும் 27ஆம் திகதி தொடங்கும் லண்டன் ஒலிம்பிக்கில் நமது விளையாட்டு நட்சத்திரங்கள் அதிக பதக்கம் வெல்ல வாய்ப்பு இருப்பதாக இவர் கூறினார்.

இது குறித்து விஜேந்தர் கூறுகையில், லண்டன் ஒலிம்பிக்கில் சிறப்பான முறையில் செயல்படுவோம். வெறுங்கையுடன் திரும்ப வாய்ப்பில்லை. ஒன்றுக்கு மேற்பட்ட பதக்கங்களை வெல்வோம் என்றார்.

பளுதூக்குதல் வீரர் ரவிகுமார் கூறுகையில், ஒலிம்பிக்கில் பளுதூக்குதல், ஆண்கள் பிரிவில் இந்தியாவுக்கு 12 ஆண்டுகளுக்குப் பின் வாய்ப்பு கிடைத்துள்ளது. எனவே இதை சிறப்பாக பயன்படுத்துவேன் என்றார்.

தேசிய விளையாட்டு பயிற்சி மைய இயக்குனர் ரனாவத் கூறுகையில், ஒலிம்பிக்கில் இந்தியா அதிக பதக்கங்கள் வெல்லும் என்ற நம்பிக்கை எனக்குள்ளது என்றார்.