இந்தியா சென்றுள்ள இங்கிலாந்து அணி ஐந்து ஒரு நாள் போட்டிகளில் பங்கேற்கிறது. முதலிரண்டு போட்டிகளில் இரு அணிகளும் தலா ஒரு வெற்றி பெற்றன.

மூன்றாவது போட்டி ஜார்க்கண்ட் தலைநகர் ராஞ்சியில் இன்று நடக்கிறது. இதில் நாணய சுழற்சியில் வெற்றி பெற்ற இந்திய அணியின் அணித்தலைவர் மஹேந்திர சிங் டோனி களத்தடுப்பை தெரிவு செய்தார்.

இந்திய அணியில் மாற்றம் எதுவும் செய்யப்படவில்லை. இங்கிலாந்து அணியில் கிறிஸ் வோக்சிற்குப் பதில் பிரஸ்னன் இடம் பெற்றார்.

இங்கிலாந்து அணிக்கு குக், பெல் இணைந்து நிதான துவக்கம் தந்தனர். பின் குக், பீட்டர்சன் தலா 17 ஓட்டங்களில் திரும்பினர். பெல் 25 ஓட்டங்கள் எடுத்தார்.

பின்பு களமிறங்கிய கீஸ்வெட்டர், சமித் படேல், டென்பாக் ஓட்டங்களின்றி ஆட்டமிழந்தனர். ரூட் 39 ஓட்டங்களும், பிரஸ்னன் 25 ஓட்டங்களும் எடுத்து ஆட்டமிழந்தனர்.

இங்கிலாந்து அணி 42.2 ஓவரில் அனைத்து விக்கெட்டுகளையும் இழந்து 155 ஓட்டங்கள் மட்டுமே எடுத்தது. இந்திய அணியின் ஜடேஜா 3 விக்கெட்டும், அஷ்வின், இஷாந்த் தலா 2 விக்கெட்டும் வீழ்த்தினர்.

இதனையடுத்து எளிய இலக்கை நோக்கி துடுப்பெடுத்தாடிய இந்திய அணி 28.1 ஓவரில் 3 விக்கெட் இழப்பிற்கு 157 ஓட்டங்கள் எடுத்து 7 விக்கெட் வித்தியாசத்தில் அபார வெற்றி பெற்றது.

கம்பீர் 33 ஓட்டங்களும், யுவராஜ் சிங் 30 ஓட்டங்களும் எடுத்து ஆட்டமிழந்தனர். ஆட்டமிழக்காமல் கோஹ்லி அரைசதம் கடந்து 77 ஓட்டங்களும், டோனி 10 ஓட்டங்களும் எடுத்தனர்.