லண்டனில் நடைபெற்று வரும் ஒலிம்பிக் தடகளப் போட்டியில் மகளிருக்கான 200 மீற்றர் ஓட்டப்பந்தயம் நேற்று நடைபெற்றது.

இதில் அமெரிக்க வீராங்கனை அலிசன் பெலிக்ஸ் 21.88 விநாடிகளில் இலக்கை எட்டி தங்கத்தைத் தட்டிச் சென்றார். 2004 மற்றும் 2008 ஒலிம்பிக் போட்டிகளில் 200 மீற்றர் ஓட்டத்தில் வெள்ளிப் பதக்கம் வென்ற பெலிக்ஸ் முதல்முறையாக தங்கம் வென்றுள்ளார்.

இந்த ஒலிம்பிக்கில் 100 மீற்றர் ஓட்டத்தில் தங்கம் வென்ற ஜமைக்காவின் ஷெல்லி-ஆன் பிரேசர் 22.09 விநாடிகளில் இலக்கை எட்டி வெள்ளிப் பதக்கத்தையும், மற்றொரு அமெரிக்க வீராங்கனையான கார்மெலிட்டா ஜெட்டர் 22.14 விநாடிகளில் இலக்கை எட்டி வெண்கலப் பதக்கத்தையும் வென்றனர்.

100 மீ. ஓட்டத்தில் தங்கம் வென்றதைப் போலவே, 200 மீ. ஓட்டத்திலும் தங்கம் வெல்ல காத்திருந்த ஷெல்லியின் கனவை பெலிக்ஸ் தகர்த்தார்.

2004 ஏதென்ஸ் மற்றும் 2008 பீஜிங் ஒலிம்பிக் போட்டிகளில் 200 மீ. ஓட்டங்களில் தங்கம் வென்றவரான ஜமைக்காவின் வெரோனிகா கேம்பெல் பிரௌன், இந்த முறை 22.38 விநாடிகளில் இலக்கை எட்டி 4வது இடத்தையே பிடித்தார்.

மேலும், முந்தைய ஒலிம்பிக் போட்டிகளில் தொடர்ந்து இரு முறை தங்கம் வென்ற அவர், இந்த ஒலிம்பிக்கில் பதக்கம் வெல்லும் வாய்ப்பையே இழந்தார் என்பது குறிப்பிடத்தக்கது.