நியூசிலாந்து சென்றுள்ள அபினவ் முகுந்த் தலைமையிலான இந்தியா ஏ அணி மூன்று போட்டிகள் கொண்ட ஒருநாள் தொடரில் பங்கேற்கிறது.

நேற்று நடந்த முதல் போட்டியில் நாணய சுழற்சியில் வெற்றி பெற்ற இந்தியா, களத்தடுப்பை தெரிவு செய்தது.

முதலில் துடுப்பெடுத்தாடிய நியூசிலாந்து அணிக்கு முன்னணி துடுப்பாட்ட வீரர்கள் சொற்ப ஓட்டங்களில் வெளியேறி ஏமாற்றினர்.

அதன் பின் களமிறங்கிய டி போர்டர் 62 ஓட்டங்களும், அணித்தலைவர் எல்லிஸ் 45 ஓட்டங்களும் எடுத்து நம்பிக்கை அளித்தனர். முடிவில் நியூசிலாந்து ஏ அணி 48.2 ஓவரில் 176 ஓட்டங்களுக்கு சுருண்டது. இந்தியா சார்பில் ஜெய்தேவ் உனத்கத் 4, புவனேஸ்வர் குமார், ராகுல் சர்மா தலா 2, அசோக் மேனரியா ஒரு விக்கெட் கைப்பற்றினர்.

சுலப இலக்கை விரட்டிய இந்திய அணிக்கு அபினவ் முகுந்த்(20), உன்முக்த் சந்த்(32) ஜோடி நல்ல தொடக்கம் கொடுத்தது. அடுத்து வந்த நமன் ஓஜா(6) ஏமாற்றினார்.

மந்தீப் சிங்(34), அம்பதி ராயுடு(26*), ராகுல் சர்மா(31) கைகொடுக்க இந்திய அணி 47.2 ஓவரில் 7 விக்கெட்டுக்கு 180 ஓட்டங்கள் எடுத்து வெற்றி பெற்றது.

இந்த வெற்றியின் மூலம் இந்தியா ஏ 1-0 என முன்னிலை வகிக்கிறது. இரண்டாவது போட்டி நாளை நடக்கவுள்ளது.