தங்களது அணி வீரர்களுக்கான ஜெர்சிக்கான (மேல் சட்டை) ஸ்பான்சர் யாரும் கிடைக்காததால் அதிருப்தி அடைந்த பிரிட்டன் கால்பந்து அணி ஒன்று தனது வீரர்களை சட்டை இல்லாமல் புகைப்படம் எடுத்து வெளியிட்டு பரபரப்பை ஏற்படுத்தியுள்ளது.

பிரிட்டனின் முதல் தர கால்பந்து அணிகளில் ஒன்று இயோவில் கால்பந்து கிளப் அணி. சோமர்செட்டில் உள்ள இந்த அணிக்கு மேல்சட்டைக்கான ஸ்பான்சர் யாரும் கிடைக்கவில்லை. இதனால் அணி வீரர்கள் மனம் நொந்து போய் விட்டனர்.

இதையடுத்து தங்களது அணிக்கு சட்டை வாங்க ஸ்பான்சர் கிடைக்காமல் இருப்பதை வெளியுலகுக்குத் தெரிவிக்க முடிவு செய்த அணியின் மேலாளர் கேரி ஜான்சன், அத்தனை வீரர்களையும் சட்டை போடாமல் வெற்று உடம்புடன் நிற்க வைத்து புகைப்படம் எடுத்து வெளியிட்டு பரபரப்பை ஏற்படுத்தியுள்ளார்.

இந்த புகைப்படத்தில் மேலாளர் கேரி, உதவி பயிற்சியாளர் டெர்ரி ஸ்கிவெர்டன், இன்னொரு உதவிப் பயிற்சியாளர் மட்டுமே முழு உடையில் உள்ளனர். வீரர்கள் அனைவரும் காற்சட்டை மட்டும் போட்டு சட்டையில்லாமல் வெறும் உடலுடன் காணப்படுகின்றனர்.

தற்போது இந்த விவகாரம் பரபரப்பை ஏற்படுத்தியதையடுத்து பல்வேறு நிறுவனங்கள் ஜெர்சிக்கான ஸ்பான்சர்ஷிப்க்கு முன்வந்துள்ளனர்.