2012ம் ஆண்டிற்கான ஒலிம்பிக் போட்டியை பிரிட்டன் மிகப்பிரம்மாண்டமான முறையில் லண்டனில் நடத்தி வருகிறது. ஆனால் பிரிட்டன் இதுவரை வெள்ளிப்பதக்கமும், வெண்கலப்பதக்கமும் மட்டுமே வென்றிருந்தது.

இந்நிலையில் துடுப்பு படகு மகளிருக்கான இரட்டையர் பிரிவு இறுதிப்போட்டி இன்று நடைபெற்றது. இதில் போட்டியை நடத்தும் பிரிட்டன் வீராங்கனைகள் தங்கம் வென்றனர். லண்டன் ஒலிம்பிக்கில் பிரிட்டன் பெறும் முதல் தங்க பதக்கம் இதுவாகும்.

கடந்த 28ம் திகதி தொடங்கிய இப்போட்டியில் இறுதிச் சுற்றுக்கு பிரிட்டன், அவுஸ்திரேலியா, நியூசிலாந்து, அமெரிக்கா, ரொமேனியா, ஜேர்மனி ஆகிய 6 நாடுகள் தகுதிப்பெற்றன.

போட்டியின் முடிவில் 7 நிமிடம் 27.13 வினாடிகளில் பந்தய தூரத்தைக் கடந்து பிரிட்டன் தங்கம் வென்றது. அவுஸ்திரேலியா 7 நிமிடம் 29.86 வினாடிகளில் கடந்து வெள்ளி பதக்கத்தையும், நியூசிலாந்து 7 நிமிடங்கள் 30.19 வினாடிகளில் கடந்து வெண்கல பதக்கத்தையும் வென்றது.